O Esperpento da Xunqueira (Vilagarcía de Arousa)

 

O  Esperpento da  Xunqueira

 Teo Cardalda F.

      Non sei que chamarlle ao feito acontecido estes días no Concello de Vilagarcía de Arousa, se esperpento ou  paranoia, aínda que os dous cualificativos válenme. O Alcalde Sr. Fole mandou talar unha morea de árbores no Parque da Xunqueira con aleivosía e case nocturnidade. Coido que o Sr. Alcalde ten metido nos miolos que a cidade é o seu coto privado, o digo pola sinxela razón que non tivo a ética “democrática”  de consultar co pobo e con toda a oposición, alegando que tiña os informes dos técnicos para actuar desa maneira. Ao día de hoxe aínda non presentou ningún informe que avale a súa esperpéntica actuación. 

Non dubido que algunhas árbores puideran estar podres para talar e logo repoñer, pero chegar á desfeita do que se fixo, é de tolos. Foi un acto ditatorial, unha arroutada que recórdame a tempos de “Paca la Culona” (sic).

    Lembro cando o seu xefe que reside en “La Moncloa”, dixo en 2008 que cando el gobernara ía plantar 500 millóns de árbores. Pero como moitos sabemos que todo o seu programa era mentira e seguen facendo todo o contrario do que dixo, o noso Sr. Alcalde  tamén segue o mesmo camiño do cinismo e mentiras, en vez de plantar as árbores os tala. Son semellantes aos pensamentos daquel tolo e xenocida  chamado Bush de tristes recordos, cando dixo:....”para rematar cos incendios tiñamos que talar as árbores”.

    A realidade ao final, cando se tira do fío, sempre descúbrese que detrás de calquera ataque á natureza hai intereses bastardos, aínda que teñan que cargarse parques, bosques, ríos ou especies enteiras.

    Pode ser que o Sr. Alcalde segue co que dicía Rajoy, aquilo de: “raíces profundas de la recuperación “, e ao ver tantos brotes verdes, tirouse  á Xunqueira e liouse como un poseso a talar. !Arredemo para o señorito¡.

 

Un pleno con tenaces

Un pleno con tenaces

    
Teo Cardalda F.
Por veces resulta moi difícil escoller un tema para poder escribir. As novas que nos deixan os xornais son tantas cada día e indignantes que se vivira D. Ramón del Valle-Inclán non daría abondo cos esperpentos. O acontecido onte no Concello de Vilagarcía asemella á primeira obra esperpéntica do autor de Vilanova :“Tirano Banderas”.
O Sr. Alcalde tomou a medida de restrinxir as mocións da oposición. Ante isto, tódolos grupos protestaron con diferentes e duras actuacións. O Sr. Alcalde con esta conducta crese o dono de Vilagarcía como a súa finca e nós os seus servos. Non me sorprende nada cada un dos seus actos e decisións.
Do filósofo grego Platón recollín unha frase que lle vai moi ben ao noso primeiro mandatario: “Un home que non arrisca nada polas súas ideas, ou non valen nada as súas ideas, ou non vale nada como home”. A democracia non só consiste en votar cada catro anos; tamén consiste en debater todo aquilo que afecta á cidadanía no seu conxunto global en toda a lexislatura. A democracia faise día a día, escoitando e debatendo con tódolos concelleiros da oposición que representan a milleiros de cidadáns. Un político que téñase como tal, cunhas mínimas inquietudes e sentido común non vai debater “o sexo dos anxos”, o teño moi claro, iso queda para o Ministro do Interior que lle rogou á Santa Teresa de Jesús que nos arranxe os problemas que temos (graves) deste país.
Os debates sempre enriquecen a política en beneficio do pobo. Cando non se debate é porque non existen ideas, aplicando a “censura” e as “tenaces”,  usando a razón da forza e non a forza da razón, sacando esas cavernícolas  ideas que xa quedaron moi lonxe no tempo e que intentan recuperar aquela “longa noite de pedra”.
Este goberno de Vilagarcía está facendo un dano irreparable á imaxe desta cidade. Unha situación vergoñenta que dana toda credibilidade. Un equipo de goberno centrado no seu propio embigo, unha fuxida a unha meta que non ten fin, cunha política sen ideas pero mercantilista.
Artigo publicado en Diario de Arousa e Galicia Dixital

Outro pleno Charramangueiro.....

Outro pleno Charramangueiro.....

Teo Cardalda F.

 

    Antonte asistimos a un pleno no concello de Vilagarcía que non lembro na historia da “democracia”. Un pleno suspendido pola provocación do Concelleiro de Cultura ante un esperpéntico razoamento do regulamento das actividades culturais e diversas asociacións da cidade.

   Regulamento que xamais foi consensuado nin falado polo devandito Concelleiro coas 36 asociacións, artistas, diversos colectivos veciñais e culturais, onde durante cinco semanas fixeron unha alternativa para chegar a un acordo. Esta alternativa foi entregada no Concello co aval de 3000 sinaturas de particulares, os representantes dos colectivos, sindicatos e os partidos da oposición: PSOE, BNG e IU. Logo falan e menten como cosacos dicindo que non hai representatividade por parte do Coordinador Xurxo Abuín elixido democraticamente polos colectivos.

   A democracia non soamente consiste en votar cada catro anos, sacar maioría coa axuda dun Judas Escariote e ter patente de corso. Non Sr. Alcalde, escoite: a democracia, por si non o sabe, faise día a día, escoitando aos cidadáns aínda que estes respectan a voluntade das urnas, onde por veces o pobo está na obriga de facer un exercicio de responsabilidade ante a prepotencia do equipo de goberno que por veces impón negociar e sacar adiante acordos que implican a cultura da cidade.

   O equipo de Goberno do PP, está centrado no seu propio embigo emprendendo unha fuxida a unha meta que non ten fin, empeñado en sacar adiante un regulamento que só pensa nunha cultura mercantilista.

   Seguen a mesma ruta que os seus cachifallos de FAES, Moncloa e Xunta, destruíndo o país, intentado socavar a “democracia” que vaise polos sumidoiros, como a auga que sae dunha billa a cachón.

    Están facendo un dano irreparable á imaxe de Vilagarcía, unha cidade que leva moitos anos no cumio a nivel de Galicia con respecto á cultura, Unha situación vergoñenta que dana a credibilidade da nosa cidade onde existe por parte do Concelleiro de Cultura unha nula sensibilidade cultural que está xerando un deterioro, tanto a nivel cultural como ás diversas asociacións de veciños. Estanse indo diversas asociacións a facer cultura a outros concellos, O premio Fermín Bouza-Brey de Poesía, que é bianual aínda non se convocou e vai para catro anos, e así podería seguir contando.

   Sr. Concelleiro, márchese dunha vez, porén, aclare antes sen trolas os  150.000 euros subvencionados que recibiu a súa asociación. Marche e non volva; súa foi a responsabilidade do charramangueiro e suspendido pleno. Fixo un insulto á intelixencia da cidadanía provocando a todos os que estaban na sá de plenos.

CANAL RIASBAIXAS - VIDEO