OS FUNDAMENTALISTAS RELIXIOSOS E O FASCISMO
Xa eramos poucos e pariu a avoa, o digo por aquilo de todos contra un
posible goberno de PSOE Unidas Podemos. Agora saen os Bispos que
falan de “opinións escuras” e outros receos, Xa está ben de
tanta permisividade coa Igrexa neste país en teoría “laico”.
¿Cal é o problema?. ¿Temen a perder as grandes subvencións e
colexios concertados e pagar o IBI máis xusto?. Pois cada vez que
escoito dicir a estes “representantes de Deus na terra” que, as
familias teñen o dereito libremente a escoller a educación. Estou
de acordo que sexa libremente e cada quen que pague os colexios
privados ou concertados do seu bolso, cousa que estes últimos son
pagados con cartos dos nosos impostos. Por iso digo que se ten que
denunciar o Concordato co Vaticano que segue sen revisar desde o 13
de xaneiro de 1979. En vez de ollar tanto o que poida facer un
goberno de progreso neste país, tiñan que ollar o que está pasando
cunhas setas relixiosas achegadas ao cristianismo que están
imperando e rondándonos ao pé da nosa casa como está pasando en
América Latina, en especial nestes intres en Bolivia; cousa que
aínda nada oímos a estes Bispos condenar a masacre golpista nese
país suramericano.
Agora que estou escribindo, estou vendo as barbaridades que están a
pasar en Bolivia cun golpe de estado (que aínda España non
condenou) sanguento, e escoito que todo eses responsables dese golpe
son uns fanáticos relixiosos evanxelistas preto de movementos
ultraconservadores. Agora están a pasear en esta Bolivia golpista
eses símbolos relixiosos e militares, igual ao que pasou en Brasil
de Bolsonaro e nos Estados Unidos de Trump; semellante á Italia de
Musolini e á de España de Franco e vemos como se van anquilosando
na sociedade máis vulnerable.
Estes fanatismo fundamentalista relixioso achegado a eses movementos
ultraconservadores, normalmente convértense políticamente en algún
tipo de fascismo en distintas formas, cousa que agora os temos no
parlamento no Estado Español e apoiados en algunhas comunidades
autónomas por eses neoliberais conservadores.
Imos ter que estar moi atentos xa que a violencia, intolerancia, a
xenofobia, homofobia e ese odio a quen non pense como eles, pode
traer un fascismo de moi malos e nefastos recordos sanguentos da
Europa dos anos 30-40 e de España durante 40 anos. Toda esta
intolerancia produce violencia e morte e está rondándonos, non
soamente á volta da cada rúa, senón dentro do salón da nosa casa.
Algo terán que dicir a todo isto eses Bispos do noso país, aínda
que algúns deles saen con declaracións de cavernas que asemellan a
estes fundamentalistas, por iso pouco ao nada podemos agardar destes
“representantes de Deus na terra”.