Desde o Preguntoiro
Un
Zarangalleiro Pleno
Teo Cardalda F.
Hai unha morea de
tempo que non asisto a un pleno no Concello de Vilagarcía, quizais
dous anos ou tres, no o sei fixamente. Desde que deixara como
presidente da AA.VV de Vilaxoán, a miña asistencia foi case nula.
Onte déuseme por asistir e quedei abraiado do estarrecemento que
sentín ante tanta mediocridade política por parte do equipo de
goberno. O digo con coñecemento de causa por ter asistido moitos
anos a plenos onde o debate político era o “alma mater”da
política municipal. Sendo os debates un dos alicerces máis
importantes para o enriquecemento das ideas e dos proxectos que se
poidan acometer en favor da cidadanía.
 |
| Foto de Diario de Arousa |
Escoitar a
algúns concelleiros de goberno a preguntas da oposición deume unha
sensación de que estaba ante uns charramangueiros con algúns “tics”
de chufóns. Sempre as respostas eran escapar polos “cerros de
Úbeda” e sen ningún resultado positivo, rematando case sempre que
non hai cartos e poñer cambadelas a todo aquilo que a oposición
intenta debater con ideas e propostas razoables.
Para rematala, o
concelleiro Sr. Cholo Dorgambide comenta un pouco alporizado
emporcallando o pleno: “hablo en castellano cuando quiero y gallego
cuando me sale de los puntos suspensivos”. Neste intre levanteime
da cadeira e fuxín rexeitando esa mediocridade e falta de educación,
cheguei inclusive a sentir vergoña allea. Foi unha falta de respecto
aos nosos antergos, aos membros da oposición e ao público
asistente.
Cando non se
debate ideas, cando falan os que gobernan derivando só polo
crematístico onde a brillantez do contrario provoca receo, a
creatividade é marxinada e a independencia a castigan, é como ir ao
cortello a matalas todas.
A impotencia, a
nula capacidade política permite que a mediocridade deste goberno
convértase nun esperpento valleinclaniano. Cando non entran nun
debate construtivo chegando ata o insulto ao idioma galego. Cando se usa a razón
da forza e non a forza da razón, lémbrame aqueles espantallos
plenos daquela “Longa Noite de Pedra”, como dicía o poeta.
Publicado en Diario de Arousa e Galicia Dixital.
Ningún comentario:
Publicar un comentario