Mariano no rural.

Mariano no rural.

Por “O curmán do fervello”, enviado especial a Ribadumia.

Estaba eu botando contas dos diferentes descontos que sobre a miña nómina está a aplicar o goberno do Partido Popular que encabeza Mariano Rajoy, cando o director deste blog chamoume a cobro revertido:

“Anda, ponte firme e marcha a Ribadumia para darnos noticias quentes sobre a chegada de Mariano a esas terras”.

Eu non acreditaba. “Quentes? Pero agora, qué somos, Ineterviú?”. “E as dietas, qué?”, dixen un chisco mosqueado. “Dietas? Dis dietas? Vicio é o que tes”, foi todo o que logrei apañar.

Así que collín o ordenata e consultei cómo chegar a Ribadumia. Bon, o certo é que primeiro de todo, consultei cómo se di Ribadumia en castelán e, miren vostedes, dixe igual, así que Mariano pode estar tranquilo, que non quedará mal cando fale cos do lugar.

Despois mirei en Google “Autobuses Pontevedra a Ribadumia”, e case caio patrás cando apareceu na pantalla “Autobuses Cuiña”, la madre que me parió, xa está o difunto tocando as pelotas desde o alén, qué bonito, o alén.

Mais non. Seguín fozando e mira por donde aparece a web de “Destinia.com” que invita así deste xeito:

Reserva tus billetes de autobús a Ribadumia, provincia de Pontevedra (España). Tan sólo tienes que hacer click en la imagen inferior y accederás a nuestro buscador de billetes de autobús a Ribadumia y el resto del mundo. Destinia.com te ofrece las mejores ofertas para viajar a Ribadumia en autobús.

Non é por amolar, pero a día de hoxe non hai máis mundo ca Ribadumia, que, grazas a Mariano e aos monos do Peñón de Xibraltar, agora é un posible obxectivo militar da aviación británica ou dos comandos eses da súa Maxestade que matan en menos de nada.

Un pouco máis abaixo, na mesma páxina web, batín contra este apartado tan simpático:

Viajes a RibadumiaVuelos a Ribadumia
Informacion sobre RibadumiaFotos de RibadumiaForos sobre RibadumiaHoteles en Ribadumia

“Vuelos a Ribadumia”? Iso sí que é mundial, total, e seguro que llo deben os veciños a Nené Barral, que anda o pobre en líos coa Xustiza por non ser como Bárcenas (“Luis, se fuerte”, decíalle Mariano nunha mensaxe que sacou á luz Pedro “Ojete” no seu xornal) e por non fumar en pipa, a quén se lle pasa pola cabeza carretar paquetes de “Camel” polo rural adiante como se a Santa Compaña gastara en labores de Tabacalera. Quero aclarar que cando escribo “Santa Compaña” non aludo, nen de pasada, a outro feliz home do lugar, coroado polo éxito: Rafel Louzán Abal.

Este home, polo que Mariano garda especial aprecio, en Estados Unidos sería negro como Obama e en Arxentina tería sofocos como a Presidenta... , non quero pensar qué acontecería se fora a Merkel en Alemania...

Vaiamos ao tema, temita, tema. O amigo Louzán xa era vicepresidente da Deputación de Pontevedra en 1996, en 2003 logrou sen presidente por primeira vez e aí leva este fenómeno até hoxe, mentres Nené Barral anda pagando os seus delictos.

E Zapatero, sen dimitir, e eu sen sacar o billete de autobús para Ribadumia porque a opción de voar en liña regular até alí non me saía a conta, tiña que facer escala en Moscú...

Ah, quedaba por ver “Foros sobre Ribadumia”: tate, premín e... tremenda oferta: “Tu viaje de novios desde 200 euros” e divorcio ao canto, colega.

En fin, pasei a ver “Hoteles en Ribadumia” e, normal, estaba visto, o establecemento onde mora a familia Rajoy non aparece. Chámase “A Casa de Alicia”, e, tal e como está mandado, fun consultar a web e tirei esta información de capital importancia para vostedes e todo de balde:

1. Aparece anunciada como “escapada rural”, e iso non cadra con Mariano, tan vilego, tan de toga e birrete, tan de Casino. Falando de casinos: este ano, e xa é o segundo, Mariano falta a cita imprescindible para todo PTV (Pontevedrés de Toda la Vida) que é o archicoñecido “Baile de Gala de La Peregrina”, no que as boas familias da cidade apresentan en sociedade os virgos machacados das fillas en idade de casar e traer fillos para Monseñor Antonio María Rouco Varela. O señores teñen que iren vestidos de smoking, se son paisanos, e se son milicos, pois uniforme de gala. As señoras e señoritas teñen que vestiren “traje de noche largo, entendiéndose por tal aquél que, como mínimo, cubra los tobillos”: claro, se levan o trapo aínda máis longo, caen ao chan seguro, porque o pisan, e alá vai a piñata de 300.000 pelas que pagou papá ou o amante.
2. En “A Casa de Alicia” entran entre 1 e 6 persoas, o que indica que os seguratas e os machacas-solta-hostias do Presidente do Goberno non caben e durmen ao raso, ou en tenda de campaña.
3. 
   Mariano pagará 270 euros diarios por alugar toda a casa de Alicia, IVE incluido. Non podo asegurar se tamén papan alí o pequeno almorzo.
4. Hai piscinita e semella que está limpita e non hai que bañarse co condón posto.
5. Cada habitación, e hai tres, ten un nome: Alicia, naturalmente; Bea e Patricia. A que máis mola e a de Patricia, fíense de min.
6. Hai un hórreo e unha alegre pendilla de patos vivos, e nas outras fotos que mirei aparecen garrafas de viño, non sei se queren decir algo con iso.
7. Para chegaren alí, xa saben: Latitud 42.514660700000 - Longitud -8.757588300000
8. Non aparecen opinións no apartado correspondente. Se queren facer chistes, non se priven, mais mellor vaian a un ciber...
9. Para rematar, se queren hospedarse en “A Casa de Alicia” entre o 12 e o 26 de agosto, vaian pensando en alugarlle o piso que ten Mariano en “Sangenjo”, herdanza familiar, porque está todo, toito ocupado pola familia nuclear de Mariano e Elvira, “Viri” para as colegazas. Poden mirar un pouco máis arriba ou abaixo, a dereita ou a esquerda da estrada, pero, créanme, os locais de hospedaxe, alterne, copas e coloniais rebosan de picoletos en bermudas con bolsito (antes chamado “mariconera”) dando un cantazo total.
10. Se gustan de andar, poden facerse os encontradizos con Mariano no camiño ese que leva a ermita, perdón, ao Mosteiro de Armenteira, destruido en tempos pola tremenda bandida galega de Nazón Pepa a Loba: non confundir con María Dolores de Cospedal.

Até outra mellorada.